စပါးအသင်းသည် နည်းပြဖြစ်သူ အန်တိုနီယိုကွန်တီ၏နေရာတွင် အစားထိုးရန်အတွက် ဘိုင်ယန်မြူးနစ်အသင်းနည်းပြဟောင်း နာဂယ်စ်မန်းနှင့်ဆွေးနွေးရန် စိတ်ဝင်စားနေကြောင်း သိရသည်။
စပါးအသင်းနှင့် ကွန်တီ၏စာချုပ်မှာ ယခုရာသီကုန်တွင် ကုန်ဆုံးမည်ဖြစ်ပြီး တစ်နှစ်ထပ်မံတိုးမြှင့်နိုင်သည့်အချက် ပါဝင်သော်လည်း ရာသီမကုန်ခင်မှာပင် လမ်းခွဲဖွယ်ရှိနေသည်။ ကွန်တီသည် ပြီးခဲ့သည့်တစ်ပတ်က ဆောက်သမ်တန်အသင်းနှင့် သရေကျ သည့်ပွဲအပြီးတွင် ကစားသမားများမှာ တစ်ကိုယ်ကောင်းဆန်သူများဖြစ်ကြောင်း ပြင်းထန်စွာ ဝေဖန်ပြောကြားခဲ့သည်။
၎င်းအနေဖြင့် နိုင်ငံတကာရက်သတ္တပတ်ကာလတွင် အီတလီသို့ပြန်၍ မိသားစုနှင့်အတူ သွားရောက်နေထိုင်လျက်ရှိပြီး လာမည့်တစ်ပတ် ပြန်လည်စတင်မည့် ပရီးမီးယားလိဂ်ပွဲစဉ်ကို ကိုင်တွယ်ခွင့်မရတော့ဘဲ လမ်းခွဲရဖွယ်ရှိနေကြောင်း ပြီးခဲ့သည့်ရက်ပိုင်းက သတင်းများ ကျယ်ပြန့်စွာထွက်ပေါ်လျက်ရှိသည်။
စပါးအသင်းသည် မော်ရင်ဟိုနှင့်လမ်းခွဲခဲ့သည့် ၂၀၂၁ ခုနှစ် နွေရာသီကတည်းက နာဂယ်စ်မန်းကို ခန့်အပ်ရန် စိတ်ဝင်စားခဲ့ခြင်းဖြစ်ပြီး ၎င်းမှာ ဘိုင်ယန်မြူးနစ်အသင်းကို ရွေးချယ်ခဲ့သောကြောင့် လက်လျှော့ခဲ့ရခြင်း ဖြစ်သည်။ အသက် ၃၅ နှစ်သာရှိသေးသည့် လူငယ်နည်းပြ နာဂယ်စ်မန်းသည် ယခုရာသီတွင် ဘိုင်ယန်မြူးနစ်အသင်းအား ချန်ပီယံလိဂ်ကွာတားဖိုင်နယ်ရောက်ရှိစေရန် စွမ်းဆောင်ပေးထားနိုင်သော်လည်း ဘွန်ဒစ်လီဂါပြိုင်ပွဲ၌ အဆင့် ၂ သို့ ရောက်ရှိသွားသဖြင့် မထင်မှတ်ဘဲ ထုတ်ပယ်ခံခဲ့ရခြင်းဖြစ်သည်။
စပါးအသင်းအနေဖြင့် ကွန်တီနှင့် လမ်းခွဲဖြစ်ပါက လက်ထောက်နည်းပြဖြစ်သူ ရိုင်ယန်မေဆန်က ရာသီကုန်အထိ ယာယီကိုင် တွယ်ဖွယ်ရှိသည်။ စပါးအသင်း နည်းပြသစ်ရာထူးအတွက် နာဂယ်စ်မန်းအပြင် နည်းပြဟောင်း ပိုချက်တီနို၊ ဘာစီလိုနာနှင့် စပိန် အသင်းနည်းပြဟောင်း လူးဝစ်အင်းနရစ်၊ ဘရိုက်တန်အသင်းနည်းပြ ရောဘတ်တိုဒီဇယ်ဘီ၊ စပို့တင်းလစ္စဘွန်းအသင်းနည်းပြ ရူဘင်အာမိုရင်နှင့် ဘန်လေအသင်းနည်းပြ ကွန်ပနီတို့လည်း ရေပန်းစားနေသည်။