နယူးကာဆယ်အသင်းနည်းပြ အက်ဒီဟောင်းက ထွက်ပေါ်နေသည့် ကောလာဟလသတင်းများသာ အမှန်တကယ်ဖြစ်ခဲ့ပါက မိမိတို့အသင်းအနေဖြင့် ကစားသမား(၁၀၀၀) လောက် ခေါ်ယူနိုင်ပြီးဖြစ်နေမည်ဟု ပြောကြားခဲ့သည်။
နယူးကာဆယ်အသင်းသည် ပိုင်ရှင်သစ်အပြောင်းအလဲဖြစ်ပေါ်ထားသလို၊ တန်းဆင်းဇုန်အတွင်း ရုန်းကန်နေရသည့်အခြေအနေကြောင့် ဇန်နဝါရီအပြောင်းအရွှေ့ကာလတွင် ကစားသမားသစ်များစွာ ခေါ်ယူဖွယ်ရှိသည်ဟု ထင်ကြေးပေးနေကြသည်။
ယင်းကဲ့သို့ ကစားသမားများစွာနှင့် အပြောင်းအရွှေ့သတင်းများ ထွက်ပေါ်နေသောကြောင့် အက်ဒီဟောင်းက ”ကျွန်တော်တို့ အဲဒီကစားသမားအားလုံးကို မခေါ်ယူနိုင်ပါဘူး။ ကျွန်တော်တို့နဲ့ ကောလာဟလသတင်းထွက်တဲ့ ကစားသမားတိုင်းကိုသာ ခေါ်ယူခဲ့မယ်ဆိုရင် ကစားသမား(၁၀၀၀)လောက် ခေါ်ယူနိုင်ပြီးဖြစ်နေမှာပါ။ လက်တွေ့ကျဖို့ လိုအပ်ပါတယ်။ ကွင်းထဲမှာ ခြေစွမ်းပြနိုင်တဲ့အပြင် အနာဂတ်အတွက် ရည်မှန်းချက်ကြီးမားတဲ့ ကစားသမားကို ကျွန်တော်တို့ ရှာဖွေသွားမှာပါ။ အပြောင်းအရွှေ့က အေးဂျင့်တွေအပေါ်လည်း အများကြီးမူတည်ပါတယ်”ဟု ပြောကြားခဲ့သည်။
