၂၀၂၀-၂၁ ဘောလုံးရာသီ ပရီးမီးယားလိဂ်ကလပ်အသင်းများ၏ အင်္ကျီစပွန်ဆာတန်ဖိုးစုစုပေါင်းမှာ ယခင်ရာသီကထက် ပေါင်(၉)သန်း လျော့ကျသွားခဲ့ကြောင်း သိရှိရသည်။
ပရီးမီးယားလိဂ်ပြိုင်ပွဲတွင် ကလပ်အသင်းများ၏ အင်္ကျီစပွန်ဆာတန်ဖိုးများမှာ တစ်နှစ်ထက်တစ်နှစ် ပိုမိုများပြားလာခဲ့ပြီး တစ်ရာသီပြီးတစ်ရာသီ ငွေကြေးတန်ဖိုးတက်ရိပ်ပြခဲ့သော်လည်း ယခုရာသီတွင် ပြိုင်ပွဲသမိုင်းတစ်လျှောက် ပထမဆုံးအကြိမ်အဖြစ် လျော့ကျသွားခဲ့ခြင်းဖြစ်သည်။
ပြီးခဲ့သည့်ရာသီက ပရီးမီးယားလိဂ်ပြိုင်ပွဲဝင်အသင်း(၂၀)၏ အင်္ကျီစပွန်ဆာတန်ဖိုး စုစုပေါင်းမှာ ပေါင် (၃၅၃.၆)သန်းရှိခဲ့သော်လည်း ယခုရာသီတွင် ပြိုင်ပွဲဝင်အသင်း(၂၀)၏ အင်္ကျီစပွန်ဆာတန်ဖိုးစုစုပေါင်းမှာ ပေါင် (၃၄၄.၅)သန်းသာ ရှိခြင်းဖြစ်သည်။
တန်ဖိုးကျဆင်းသွားသော အသင်းများထဲတွင် မန်ယူ၊ အဲဗာတန်၊ ဆောက်သမ်တန်၊ ဘန်လေအစရှိသည့်အသင်းများပါဝင်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
Daily Mail ၏ဖော်ပြချက်အရ မန်ယူအသင်းသည် ၎င်းတို့၏ အင်္ကျီစပွန်ဆာကုမ္ပဏီ Chevrolet ထံမှ ရရှိသည့် စပွန်ဆာငွေမှာ ပြီးခဲ့သည့် ရာသီကထက် ပေါင်(၄)သန်းလျော့နည်းသွားခဲ့ကြောင်း သိရှိရသည်။
အဲဗာတန်အသင်းမှာလည်း လက်ရှိအင်္ကျီစပွန်ဆာချုပ်ဆိုထားသည့် Cazoo ကားကုမ္ပဏီထံမှ တစ်နှစ်ပေါင်(၁၀)သန်းခန့်ရရှိမည်ဖြစ်ပြီး၊ ယခင်စာချုပ်ချုပ်ဆိုခဲ့သည့် Sport Pesa ကုမ္ပဏီထက် ပေါင် (၆)သိန်းခန့် လျော့နည်းခဲ့ကြောင်းသိရသည်။
