လီဗာပူးလ်အသင်းသည် ကိုရိုနာဗိုင်းရပ်စ်ကြောင့် ၎င်းတို့ရရှိမည့် ဆုကြေးငွေများထဲမှ ပေါင်(၉)သန်း ခန့်နစ်နာမည်ဖြစ်ပြီး စုစုပေါင်းဆုကြေးငွေ ပေါင်(၁၇၅)သန်း ရရှိမည်ဖြစ်ကြောင်း သိရှိရသည်။
ပရီးမီးယားလိဂ်ပြိုင်ပွဲဝင်ကလပ်အသင်းများကို ရာသီကုန်ဆုံးချိန်တွင် ပရီးမီးယားလိဂ်အဖွဲ့ချုပ်က ဆုကြေးငွေများ ခွဲဝေပေးလေ့ရှိပြီး၊ ယင်းဆုကြေးများမှာ ပမာဏအညီအမျှ ခွဲဝေပေးသည့် Equal Share ၊ နိုင်ငံတကာရုပ်သံဝင်ငွေအား ခွဲဝေပေး သည့် International TV Share ၊ အကျိုးအမြတ်ဝင်ငွေများအပေါ် မူတည်၍ ခွဲဝေပေးသည့် Central Commercial Share ၊ ပြည်တွင်းရုပ်သံဝင်ငွေအပေါ် မူတည်၍ ခွဲဝေပေးသည့် Facility Fees ၊ အမှတ်ပေးဇယားရပ် တည်မှုအပေါ်မူတည်၍ ခွဲဝေပေးသည့် Merit Payment တို့ဖြစ်သည်။
ယင်း ငွေကြေးများထဲမှ လီဗာပူးလ်အသင်းသည် ပြီးခဲ့သည့် ၂၀၁၉-၂၀ ရာသီအတွက် Merit Payment ပေါင်(၆၃)သန်းရရှိမည့်အစား (၁၄)ရာခိုင်နှုန်းလျော့ကျကာ ပေါင်(၅၄)သန်းသာ ရရှိခဲ့ကြောင်း သိရသည်။
သို့ဖြစ်ရာ လီဗာပူးလ်အသင်းသည် ပေါင်(၉)သန်းနစ်နာခဲ့ပြီး စုစုပေါင်းဝင်ငွေရရှိမှုတွင် ပေါင်(၁၇၅) သန်းရရှိမည်ဖြစ်ကြောင်း သိရှိရသည်။
၂၀၁၈-၁၉ရာသီက လီဗာပူးလ်အသင်းသည် စုစုပေါင်းဝင်ငွေ ပေါင် (၁၅၂.၄)သန်း ရရှိခဲ့ပြီး (ပြည်တွင်းထုတ်လွှင့်မှုပွဲစဉ် ပိုများခဲ့၍) ချန်ပီယံ မန်စီးတီးအသင်းထက် ဝင်ငွေပေါင် (၁.၅)သန်းနီးပါး ပိုမိုရရှိခဲ့သည်။
