ချယ်လ်ဆီးနောက်ခံလူဟောင်း ဂလင်းဂျွန်ဆင်က အသင်းဟောင်းအနေဖြင့် ခရိုအေးရှားကွင်းလယ်ကစားသမား ကိုဗာချစ်ကို မန်စီးတီးအသင်းထံ ရောင်းချခဲ့ခြင်းအတွက် နောင်တရလိမ့်မည်ဟု ပြောကြားခဲ့သည်။
ချယ်လ်ဆီးအသင်းသည် ယခုနွေတွင် အသင်းကစားသမားများကို ရောင်းထုတ်နေပြီး ယင်းထဲမှ ထိပ်တန်းကစားသမားများကို ပရီးမီးယားလိဂ်ပြိုင်ဘက်အသင်းများထံ ရောင်းချခဲ့ခြင်းဖြစ်သည်။
ချယ်လ်ဆီးအသင်းသည် ဟာဗက်ဇ်ကို အာဆင်နယ်၊ ကိုဗာချစ်ကို မန်စီးတီးနှင့် မေဆန်မောင့်အား မန်ယူအသင်းထံသို့ ရောင်းချခဲ့ ခြင်းဖြစ်သည်။ ချယ်လ်ဆီးသည် ကိုဗာချစ်အား မန်စီးတီးအသင်းထံ Add-ons ကြေးများအပါအဝင် ပေါင်သန်း (၃၀) ဖြင့် ရောင်းချခဲ့ခြင်းဖြစ်သည်။
ဂလင်းဂျွန်ဆင်က “အခုနွေမှာ ကိုဗာချစ်ဟာ ချယ်လ်ဆီးအတွက် အကြီးမားဆုံး ဆုံးရှုံးမှုဖြစ်မယ်လို့ ကျွန်တော် ထင်ပါတယ်။ ချယ်လ်ဆီးအနေနဲ့ ကိုဗာချစ်အတွက် သင့်တော်တဲ့ ကြေးရလိုက်ပေမဲ့ သူတို့ထက် ပိုကောင်းတဲ့အသင်းထံ ရောင်းချခဲ့တာပါ။ ကိုဗာချစ်က မန်စီးတီးကိုပိုကောင်းအောင် လုပ်ပေးနိုင်သူဖြစ်ပြီး သူကလည်း ကမ္ဘာ့အဆင့်ကစားသမားပါ။ ကိုဗာချစ်ကို ခေါ်ယူခဲ့တာဟာ မန်စီးတီးအတွက် အရမ်းကောင်းတဲ့လုပ်ရပ်ဖြစ်ပြီး ချယ်လ်ဆီးကတော့ သူ့ကို ရောင်းချခဲ့တဲ့အတွက် နောင်တရပါလိမ့်မယ်” ဟု ပြောကြားခဲ့သည်။
