ရီးယဲလ်အသင်း နည်းပြ ဇီဒန်းက ကာလရှည်ကြာ ဂိုးပေါက်ပျောက်ဆုံးမှုကို အဆုံးသတ်နိုင်ခဲ့သည့် ဟာဇက်အတွက် မိမိတို့အားလုံးပျော်ရွှင်မိသည်ဟု ပြောကြားခဲ့သည်။
ဟွယ်ဆကာအသင်းအား (၄- ၁) ဂိုးဖြင့်အနိုင်ရသည့် လာလီဂါပွဲစဉ် (၈)တွင် ရီးယဲလ်အသင်းအတွက် အဖွင့်ဂိုးသွင်းယူပေးခဲ့သည့် ဟာဇက်အနေဖြင့် အသင်းအတွက် (၃၉၂)ရက် ကြာ ဂိုးပေါက်ပျောက်ဆုံးမှုကို အဆုံး သတ်နိုင်ခဲ့ကြောင်း သိရသည်။
ဟာဇက် ဂိုးသွင်းနိုင်ခဲ့ခြင်းနှင့်ပတ်သက်ပြီး ရီးယဲလ်နည်းပြ ဇီဒန်းက ”ဟာဇက်ရဲ့ဂိုးအတွက် ကျွန်တော်တို့အားလုံး ပျော်ရွှင်ရပါတယ်။ သူကိုယ်တိုင်လည်း ဒီသွင်းဂိုးအတွက် ပျော်ရွှင်နေသလို၊ အသင်းဖော်တွေအားလုံးကလည်း သူ့ရဲ့ စွမ်း ဆောင်ရည်အတွက် ကျေနပ်ပျော်ရွှင်နေကြပါတယ်”ဟု ပွဲပြီးသတင်းစာရှင်းလင်းပွဲတွင် ပြောကြားခဲ့သည်။
ဟာဇက်သည် အဆိုပါပွဲစဉ်တွင် ပွဲချိန်မိနစ် (၄၀)၌ ဗယ်လ်ဗာဒီ၏ဖန်တီးပေးမှုမှတစ်ဆင့် အသင်းအတွက် အဖွင့်ဂိုးကို (၂၅)ကိုက်အကွာမှ လှလှပပကန်သွင်းယူပေးခဲ့ခြင်းဖြစ်သည်။
ဟာဇက်အနေဖြင့် တစ်လကျော်ကြာ အနားယူခဲ့ရသော ကြွက်သားဒဏ်ရာမှ ပြန်လည်သက်သာလာပြီးနောက် အသင်းအတွက် ပထမဆုံးပွဲထွက်ကစားသည့်ပွဲစဉ်တွင် ခြေစွမ်းပြဂိုးသွင်းယူနိုင်ခဲ့ခြင်းဖြစ်သည်။
ဟာဇက်အနေဖြင့် ရီးယဲလ်အသင်းအတွက် နောက်ဆုံးဂိုးသွင်းယူနိုင်ခဲ့သည်မှာ ပြီးခဲ့သည့်အောက်တိုဘာလအတွင်းက ကစားခဲ့သော ဂရန်နာဒါအသင်းအား (၄-၂)ဂိုးဖြင့် အနိုင်ရသည့်ပွဲစဉ်တွင်ဖြစ်ပြီး ယခုတစ်နှစ်ကျော်အကြာတွင်မှ ဂိုးပြန်လည်သွင်းယူနိုင်ခဲ့ခြင်းဖြစ်သည်။
