၂၀၂၂ ကာတာကမ္ဘာ့ဖလားပြိုင်ပွဲ၏ သံတမန်ရာထူးကို ဒေးဗစ်ဘက်ခမ် လက်ခံခဲ့ခြင်းမှာ ကြီးမားသည့်အမှားတစ်ခုကို ကျူးလွန်ခြင်းဟု မန်ယူအသင်းဖော်ဟောင်း ကန်တိုနာက သုံးသပ်ခဲ့သည်။ The Athletic နှင့် တွေ့ဆုံမှုတွင် ကန်တိုနာက ဘက်ခမ်အနေ ဖြင့် ယင်းရာထူးလက်ခံခဲ့မှုအပေါ် ပြန်လည်စဉ်းစားသင့်ကြောင်း တိုက်တွန်းခဲ့ပြီး သူ၏ အသင်းဖော်ဟောင်းအနေဖြင့် ကာတာတွင် အမှန်တကယ်ဖြစ်ပျက်နေသည့်အရာများကို သတိမမူခဲ့ဖွယ်ရှိသည်ဟု ဆိုခဲ့သည်။
အင်္ဂလန်လက်ရွေးစင်ဟောင်း ဘက်ခမ် အနေဖြင့် ပြီးခဲ့သည့်ဖေဖော်ဝါရီလက ယင်းရာထူးကို ပေါင် ၁၀ သန်းတန် သဘောတူစာ ချုပ်ဖြင့် လက်ခံခဲ့ပြီး ပြီးခဲ့သည့်လများအတွင်း ယင်းရာထူးယူခဲ့မှုကြောင့် သူ့အပေါ် ဝေဖန် မှုများလည်း ရှိခဲ့သည်။ ဘက်ခမ်၏သံတမန် ရာထူးမျိုးကို လက်ခံမည်လားဟု The Athletic က မေးမြန်းမှုကို ကန်တိုနာက ယခုကဲ့သို့ ပြန်လည်တုံ့ပြန်ခဲ့သည်။
“ကျွန်တော် ဘယ်အရာမှ လုပ်မှာမဟုတ်ပါဘူး။ ဆန့်ကျင်တာပဲ ကျွန်တော် လုံးဝလုပ်ဖြစ်လိမ့်မယ်။ ၂၀၂၂ ဇန်နဝါရီမှာ အခုစကားတွေကို ကျွန်တော် စတင်ပြောခဲ့ပါတယ်။ ကျွန်တော်က ပထမဆုံး တစ်ယောက်လည်း ဖြစ်နိုင်ပါတယ်။ ဒါပေမဲ့ ကျွန်တော်က ဒီလိုလုပ်ဖို့ လွတ်လပ်သူတစ်ဦး ပါ။ တကယ်တော့ ကစားသမားဟောင်းတစ်ဦး အနေနဲ့ ဒီလိုလုပ်ကိုင်မှုကနေ ဝင်ငွေလည်း ရရှိပါတယ်။ အဲဒီမှာ ဖြစ်ပျက်ခဲ့တာတွေကို သူတို့ မသိရှိခဲ့ရင်တော့ လုပ်ပါလိမ့်မယ်။ ဒါ မှမဟုတ် သူတို့ ဒါတွေကို သိလျက်သားနဲ့ လုပ်တာဆိုရင်တော့ သူတို့ အမှားကျူးလွန်တာပါပဲ။ သူတို့ ကြီးမားတဲ့အမှားတစ်ခုကို လုပ်ခဲ့တယ်လို့ ကျွန်တော် ယူဆပါတယ်။ အရမ်းကြီးမားတဲ့ အမှားတစ်ခုပါ။ ကမ္ဘာ့ဖလား ပြိုင်ပွဲကို သပိတ်မှောက်မယ်လို့ ပြောလာတဲ့ ကစားသမားရှိရင် Bravo လို့ ပြောမှာပါ။ ဒါပေမဲ့ ကစားသမားသက်တမ်း ၁၀ နှစ်သာ ရှိသေးတဲ့ အသက် ၂၀ အရွယ် ကစားသမား တစ်ဦးကိုတော့ ပြစ်တင်ရှုတ်ချလို့ မရပါဘူး။ ဒါပေမဲ့ အဖွဲ့အစည်းတွေ၊ နိုင်ငံရေးသမားတွေကတော့ ကမ္ဘာ့ဖလားပြိုင်ပွဲကို မသွားသင့်ဘူးလို့ ပြောရမယ်။ ကစားသမားတွေက ကမ္ဘာ့ဖလားပြိုင်ပွဲကို သပိတ်မမှောက်လို့လည်း ကျွန်တော်တို့ စိတ်မပျက်ပါဘူး။ ဘာဖြစ်လို့လဲဆိုတော့ နိုင်ငံရေးသမားတွေ၊ သမ္မတတွေ၊ အဖွဲ့အစည်းတွေနဲ့ ဝန်ကြီးတွေက ဒီပြိုင်ပွဲကို သပိတ်မှောက်ဖို့ အခွင့်အာဏာရှိပါတယ်” ဟု ကန်တိုနာက ပြောကြားခဲ့သည်။
ကာတာ နိုင်ငံသည် နိုင်ငံအတွင်း လူ့အခွင့်အရေးချိုး ဖောက်မှုများအပေါ် အားကစားကဏ္ဍဖြင့် ဖုံးလွှမ်းနိုင်ရန် ကြိုးပမ်းနေသည်ဟု စွပ်စွဲခံထားရသည်။ အပြည်ပြည်ဆိုင်ရာလွတ်ငြိမ်းချမ်းသာခွင့်အဖွဲ့ (AI) ကလည်း ပြီးခဲ့သည့် ဇွန်လက ဘက်ခမ်အား ယင်းရာထူးရယူမှုအပေါ် ပြစ်တင်ရှုတ်ချခဲ့သည်။
