ချယ်လ်ဆီးအသင်း၏နည်းပြ သောမတ်စ်တူဟယ်လ်က ကလပ်ကမ္ဘာ့ဖလားချန်ပီယံဆုကို အရယူရန် မိမိတို့ စိတ်ပိုင်းဖြတ်ထားခဲ့ကြောင်းနှင့် အသင်းပိုင်ရှင် အေဘရာမိုဗစ်ချ်အတွက် ရည်ရွယ်ကြောင်း ပြောကြားခဲ့သည်။
ချယ်လ်ဆီးအသင်းသည် ကလပ်ကမ္ဘာ့ဖလားကို အသင်းအတွက် ပထမဆုံးရယူနိုင်ခဲ့ခြင်းဖြစ်ပြီး ပရီးမီးယားလိဂ်၌ မန်ယူနှင့် လီဗာပူးလ်တို့နောက် တတိယမြောက်ရယူနိုင်သော အသင်းလည်း ဖြစ်လာခဲ့သည်။
တူဟယ်လ်သည် ယခု ပြိုင်ပွဲမတိုင်မီ COVID-19 ကူးစက်ခံခဲ့ရသည့်အတွက် အသင်းနှင့်အတူ ယူအေအီးနိုင်ငံသို့ တစ်ပါတည်း လိုက်ပါ နိုင်ခြင်းမရှိဘဲ ဆီမီးဖိုင်နယ်ပွဲစဉ်နှင့် လွဲချော်ခဲ့ရသော်လည်း ဗိုလ်လုပွဲအမီ လိုက်ပါကြီးကြပ်နိုင်ခဲ့သည်။
တူဟယ်လ်သည် ဗိုလ်လုပွဲမတိုင်မီညမှသာ အသင်းနှင့် ပူးပေါင်းနိုင်ခဲ့ခြင်းဖြစ်သည်။ တူဟယ်လ် က “ပွဲမတိုင်ခင်မှာ ဒါဟာ ပြိုင်ဘက်အားလုံး မနာလိုဖြစ်ရတဲ့ပြိုင်ပွဲ၊ အရယူရမယ့် ဆုဖလားလို့ ကစားသမားတွေကို ပြောခဲ့ပါတယ်။ ပွဲပြီးတော့ အေဘရာမိုဗစ်ချ်က ဂုဏ်ယူကြောင်း ပြောပါတယ်။ ကျွန်တော်ကလည်း ဒါ ခင်ဗျားအတွက်၊ ဒါ ခင်ဗျားရဲ့အသင်းလို့ ပြန်ပြောလိုက်ပါ တယ်” ဟု ဆိုခဲ့သည်။
