လီဗာပူးလ်အသင်းသည် အဘာဒင်းအသင်းမှ စကော့တလန်နောက်ခံလူ ကယ်လ်ဗင်ရမ်ဆေးကို ခေါ်ယူခဲ့ပြီးနောက် ယခုနွေရာသီ ကစားသမားခေါ်ယူမှု အဆုံးသတ်ဖွယ်ရှိကြောင်း Daily Mail က ဖော်ပြခဲ့သည်။
လီဗာပူးလ်အသင်းသည် ကယ်လ်ဗင်ရမ်ဆေး(၁၈ နှစ်)ကို ကနဦး ပြောင်းရွှေ့ကြေး ပေါင်(၄)သန်း၊ ထပ်ဆောင်းဆုကြေး ပေါင်(၂.၅)သန်းဖြင့် ခေါ်ယူခဲ့ခြင်းဖြစ်ပြီး (၅)နှစ်စာချုပ်ချုပ် ဆိုခဲ့သည်။ ကယ်လ်ဗင်ရမ်ဆေးသည် လီဗာပူးလ်အသင်းတွင် ကျောနံပါတ် (၂၂)ဝတ်ဆင်သွားမည်ဖြစ်ပြီး အာနိုးလ်၏ အရန်ကစားသမားအဖြစ် ရပ်တည်သွားရမည်ဖြစ်ကြောင်း သိရသည်။
ကယ်လ်ဗင်ရမ်ဆေးသည် ပြီးခဲ့သည့်ရာသီက စကော့တလန်အားကစားကလောင်ရှင်များအဖွဲ့မှ ရွေးချယ်သည့် စကော့တလန်လိဂ်၏ အကောင်းဆုံးလူငယ်ကစားသမားဆုကို ရရှိခဲ့သူ ဖြစ်သည်။
လီဗာပူးလ်အသင်းသည် ဖူလ်ဟမ်ကွင်းလယ်လူ ဖေဘီယိုကာဗယ်လ်ဟို၊ ဘင်ဖီကာတိုက်စစ်မှူး ဒါဝင်နူနက်ဇ်နှင့် ယခု ကယ်လ်ဗင်ရမ်ဆေးကို ခေါ်ယူခဲ့ပြီးနောက် ကစားသမားသစ် ထပ်ခေါ်ရန် အစီအစဉ်မရှိတော့ကြောင်း Daily Mail က သုံးသပ်ဖော်ပြခဲ့သည်။
