ကစားသမားသစ် ခေါ်ယူပေးရန် တောင်းဆိုခဲ့သည့် တူဟယ်လ်ကို PSG အားကစားဒါရိုက်တာ ဝေဖန်

PSG အသင်းအားကစားဒါရိုက်တာဖြစ်သူ လီယိုနာဒိုသည် ကစားသမားသစ်များ ခေါ်ယူပေးရန် တောင်းဆိုခဲ့သည့် အသင်းနည်းပြ တူဟယ်လ်ကို ဝေဖန်ပြောကြားခဲ့သည်။

PSG အသင်းသည် ယခုရာသီ လီဂူး-၁ပြိုင်ပွဲတွင် အဖွင့်ပွဲ (၂)ပွဲဆက် ရှုံးနိမ့်ခဲ့သော်လည်း (၄)ပွဲဆက်တိုက် အနိုင်ရထားကာ ရမှတ် (၁၂) ဖြင့် အဆင့် (၂)နေရာ၌ ရပ်တည်နေသည်။

PSG အသင်းသည် ယခုနွေရာသီအပြောင်းအရွှေ့ကာလတွင် ပြီးခဲ့သည့်ရာသီက အငှားဖြင့်ခေါ်ယူထားသည့် အီကာဒီနှင့် ရီကိုတို့ကို အပြီးသတ် ခေါ်ယူထားပြီး ကစားသမားသစ်အနေဖြင့် ရိုးမားအသင်းမှ အီတလီနောက်ခံလူ ဖလော်ရန်ဇီတစ်ဦးတည်းကိုသာ ခေါ်ယူထားရသေးသည်။

ထို့ပြင် PSG အသင်းအနေဖြင့် ယခုနွေရာသီအပြောင်းအရွှေ့ကာလတွင် ကာဗာနီ၊ သီယာဂိုဆေးလ်ဗား၊ မူနီယာ၊ ချူပိုမိုတင်းတို့အပါအဝင် ကစားသမား (၇)ဦးအထိ လက်လွှတ်ခဲ့ရသည်။ ထို့ကြောင့် တူဟယ်လ်က အသင်းအနေဖြင့် ကစားသမားသစ်များ ခေါ်ယူပေးရန် လူသိရှင်ကြား တောင်းဆိုခဲ့ခြင်းဖြစ်သည်။

သို့သော် လီယိုနာဒိုက တူဟယ်လ်၏ တောင်းဆိုမှုကို သဘောကျခြင်းမရှိဘဲ တူဟယ်လ်အနေဖြင့် ယခုကဲ့သို့ လူသိရှင်ကြား ဆက်လက်တောင်းဆိုနေမည်ဆိုပါက ပြစ်ဒဏ်ချမှတ်ခံရနိုင်ကြောင်း ပြောကြားခဲ့ခြင်းဖြစ်သည်။

လီယိုနာဒိုက “ကျွန်တော်တို့အနေနဲ့ အပြောင်းအရွှေ့စျေးကွက်မှာ ကစားသမားသစ်တွေ ခေါ်ယူဖို့အတွက် စောင့်ကြည့်နေပါတယ်။ တူဟယ်လ်ပြောတာတွေကို ကျွန်တော် သဘောမကျပါဘူး။ သူ့အနေနဲ့ ဘာကြောင့် ဒီလိုတွေ ပြောနေသလဲဆိုတာကို ကျွန်တော် နားမလည်ပါဘူး။ ဒါကို အသင်းကလည်း မနှစ်သက်ပါဘူး။ တကယ်လို့ သူ မကျေနပ်တာရှိရင် အချင်းချင်း ပြောလို့ ရပါတယ်။ ကိစ္စမရှိပါဘူး။ သူ့အနေနဲ့ အသင်းမှာ ဆက်ရှိချင်တယ်ဆိုရင် အသင်းရဲ့ဆုံးဖြတ်ချက်ကို လေးစားရပါမယ်။ ကလပ်အသင်းက အရေးအကြီးဆုံးပါ။ တူဟယ်လ်ပြောတာကို ကျွန်တော်တို့ သဘောမကျပါဘူး။ ဒီကိစ္စကို ကျွန်တော်တို့ ဖြေရှင်းရပါမယ်”ဟု ပြောကြားခဲ့သည်။