ပရီးမီးယားလိဂ် ရာသီအဖွင့်ပွဲစဉ်အဖြစ် တနင်္လာနေ့ကစားရမည့် ဘရိုက်တန်နှင့်ပွဲတွင် ကစားသမားများသစ်ဖြစ်သည့် ဇီယက်ရှ်၊ ချီဝဲလ်နှင့် သီယာဂိုဆေးလ်ဗားတို့ ပါဝင်နိုင်မည်မဟုတ်ကြောင်း ချယ်လ်ဆီးအသင်းနည်းပြ လမ်းပတ် က အတည်ပြုပြောကြားသည်။
တောင်ပံကစားသမား ဇီယက်ရှ်သည် ဘရိုက်တန်အသင်းနှင့် ရာသီကြိုခြေစမ်းပွဲ၌ ဒူးဒဏ်ရာရရှိခဲ့ခြင်းဖြစ်ပြီး ဘယ်နောက်ခံလူ ချီဝဲလ်မှာ ကြံ့ခိုင်မှုမပြည့်ဝသေးကြောင်း သိရသည်။
![](https://sportsmyan.com/wp-content/uploads/2020/09/Chelsea-25-1024x536.jpg)
ခံစစ်အတွင်းလူ သီယာဂိုဆေးလ်ဗားမှာလည်း အသင်းလိုက်လေ့ကျင့်မှုမပြုလုပ်ရသေးသဖြင့် ပါဝင်နိုင်မည်မဟုတ်ကြောင်း ကြာသပတေးနေ့ကပြုလုပ်သည့် ပွဲကြိုသတင်းစာရှင်းလင်းပွဲတွင် လမ်းပတ်က ပြောကြားသည်။
“ဟာကင်ဇီယက်ရှ်က ဘရိုက်တန်နဲ့ပွဲမှာ ဒူး ဒဏ်ရာရရှိခဲ့တာပါ။ ဒါကြောင့် သူပါဝင်နိုင်မှာ မဟုတ်ပါဘူး။ ရက်သတ္တပတ်နည်းနည်းလောက်၊ နှစ်ပတ်လောက်ကြာနိုင်တယ်လို့ မျှော်လင့်ပါတယ်။ ဒါပေမဲ့ အခြေအနေကို ကျွန်တော်တို့ စောင့်ကြည့်ရပါဦးမယ်။ ဘန်ချီဝဲလ်က ကြံ့ခိုင်မှုပိုင်း ဦးစားပေးလုပ်နေပြီး ဒီတစ်ပတ်ထဲမှာ တိုးတက်မှုရှိလာပါတယ်။ သူက လမ်းကြောင်းမှန်ပေါ်ရောက်နေပြီဖြစ်ပေမယ့် ဘရိုက်တန်နဲ့ပွဲအတွက်တော့ အဆင်သင့်မဖြစ်သေးပါဘူး။ သီယာဂိုက လန်ဒန်ကို ရောက်နေပါပြီ။ ဒါပေမဲ့ ဒီရက်သတ္တပတ်ကုန် အထိ ကျွန်တော်တို့နဲ့အတူ မလေ့ကျင့်ရသေး ပါဘူး။ ဒါကြောင့် ဒီပွဲအတွက် သူကစားနိုင်ဖို့ ကျွန်တော်သံသယရှိနေပါတယ်” လမ်းပတ်က ဆိုခဲ့သည်။
![](https://sportsmyan.com/wp-content/uploads/2020/09/Chelsea-26-1024x536.jpg)
ထို့ပြင် ချယ်လ်ဆီးအသင်းသည် ပြီးခဲ့ သည့်ရာသီက ခြေစွမ်းပြကစားခဲ့သည့် အမေ ရိကန်ကွင်းလယ်လူ ပူလီဆစ်ကို ဂျိုးကိုးလ်၊ ဟာဇက်၊ ဝီလီယံတို့ဝတ်ဆင်ခဲ့သော နံပါတ် ၁၀ ပြောင်းလဲဝတ်ဆင်ခွင့်ပြုခဲ့ကြောင်း သိရ သည်။ ချယ်လ်ဆီးအသင်းအတွက် ပထမဆုံး ကစားခွင့်ရသည့်ရာသီတွင် နံပါတ် (၂၂) ဝတ်ဆင်ခဲ့သူ ပူလီဆစ် (၂၁ နှစ်) သည် ပြိုင်ပွဲစုံတွင် (၁၁) ဂိုးသွင်းယူကာ ဂိုးဖန်တီးမှု (၁၀) ကြိမ် ပြုလုပ်ပေးနိုင်ခဲ့ပြီး ပရီးမီးယားလိဂ် လူငယ် အကောင်းဆုံးဆုအတွက် ဆန်ခါတင်စာရင်း၌ ရွေးချယ်ခံခဲ့ရသည်။