ဘာစီလိုနာဝါရင့်နောက်ခံလူ အဲလ်ဗတ်စ်က အသင်းဖော်ဟောင်းဖြစ်သူ PSG တိုက်စစ်မှူး မက်ဆီအား ကစားသမားဘဝကို ဘာစီလိုနာအသင်းတွင်သာအဆုံးသတ်ရန် လူသိရှင်ကြား တောင်းဆိုခဲ့သည်။
အသက် (၃၄)နှစ်အရွယ်ရှိ မက်ဆီသည် ပြီးခဲ့သည့် ၂၀၂၀-၂၁ ရာသီကုန်တွင် ဘာစီလိုနာအသင်းနှင့် စာချုပ်သက်တမ်းကုန်ဆုံးခဲ့ပြီး အသင်းတွင် ဆက်နေရန်အတွက် လစာထက်ဝက်လျှော့ယူရန် သဘောတူခဲ့သည်။
သို့သော် လာလီဂါလစာစည်းမျဉ်းကြောင့် ဘာစီလိုနာအသင်းသည် မက်ဆီကို အသင်းတွင် ဆက်ထိန်းရန် မတတ်နိုင်သဖြင့် ပြီးခဲ့သည့် နွေရာသီအပြောင်းအရွှေ့ကာလကမှ PSG အသင်းသို့ လက်လွှတ်ခဲ့ရသည်။
ဘာစီလိုနာအသင်းတွင် မက်ဆီနှင့် ၂၀၀၈ ခုနှစ်မှ ၂၀၁၆ ခုနှစ်အထိ တွဲဖက်ကစားခဲ့ပြီး ၂၀၂၁ နိုဝင်ဘာလကမှ ဘာစီလိုနာအသင်းသို့ ပြန်လည်ရောက်ရှိလာသည့် ဘရာဇီးလ်နောက်ခံလူ အဲလ်ဗတ်စ်က ဘာစီလိုနာအသင်းမှာ မက်ဆီအတွက် ကစားသမားဘဝအဆုံးသတ်ရန် အကောင်းဆုံးနေရာဖြစ်ကြောင်း ပြောကြားခဲ့ခြင်းဖြစ်သည်။
အဲလ်ဗတ်စ်က ”မက်ဆီက ဘောလုံးသမိုင်းမှာ အကောင်းဆုံးကစားသမားပါ။ ဘာစီလိုနာမှာ သူ့ကို မတွေ့ရတာ ထူးဆန်းပါတယ်။ တစ်ခါတလေ ကျွန်တော်တို့ မျှော်လင့်ထားတဲ့အတိုင်း ဖြစ်မလာတတ်ပါဘူး။ မင်းအတွက် ဘာစီလိုနာထက် ကောင်း တဲ့နေရာမရှိဘူးလို့ မက်ဆီကို ကျွန်တော် ပြောထားပြီးသားပါ။ မက်ဆီအနေနဲ့ ကစားသမားဘဝကို ဘာစီလိုနာအသင်းမှာ အဆုံးသတ်မယ်ဆိုရင် အရမ်းကောင်းမှာပါ”ဟု ပြောကြားခဲ့သည်။
